Қазақстандық жүргізушілерге бір айыппұл жеңілдетілді

Қазақстанда ақылы автомобиль жолдары үшін төлем жасау тәртібі өзгерді. Тиісті өзгерістерді Көлік министрлігі бекітті.

Бұған дейін жүргізушілер ақылы жолмен жүргеннен кейін 7 күн ішінде төлем жасауы тиіс болатын. Егер төлем жасалмаса, 8-күні материалдар көліктік бақылау органдарына жіберіліп, жүргізуші әкімшілік жауапкершілікке тартылатын.

Жаңа өзгерістерге сәйкес, енді жүргізушілерге төлем жасау үшін 30 күн уақыт беріледі. Яғни айыппұл салу үшін материалдар 31-күні ғана көліктік бақылау органдарына жолданады.

Ал заңды тұлғалар үшін бөлек тәртіп белгіленді: олар төлемді есепті айдан кейінгі айдың 20-сына дейін төлеуі керек.

Еске салсақ, 2026 жылы ақылы жол үшін төлем жасамағаны үшін:

• жеке тұлғаларға – 5 АЕК (21 625 теңге),

• заңды тұлғаларға – 10 АЕК (43 250 теңге) мөлшерінде айыппұл белгіленген.

Министрлік мәліметінше, өзгерістер жүргізушілерге төлем жасау үшін көбірек уақыт беру мақсатында енгізілген.

Қол қойылған бұйрық алғаш ресми жарияланған күннен кейін 10 күн өткен соң күшіне енеді.