Қазақстандық ЖИ стартап Microsoft-тың жаһандық бағдарламасына өтті

Қазақстандық Cybernet AI жасанды интеллект стартапы Microsoft корпорациясының Microsoft for Startups халықаралық бағдарламасына іріктеліп, 350 мың доллардан астам көлемде гранттық қолдауға ие болды. Бұл — әлемдік нарыққа шығуға ниетті, тұрақты дамып келе жатқан технологиялық компанияларға арналған ауқымды бастама.

Cybernet AI — Astana Hub технопаркінің резиденті. Компания дауыспен басқарылатын корпоративтік ЖИ шешімдерін әзірлейді. Өнімдер жоғары қауіпсіздік, өнімділік және масштабталу талаптарына сай келеді. Қазіргі таңда стартап Қазақстаннан бөлек, Өзбекстан, Қырғызстан, Мысыр, АҚШ елдерінде жұмыс істейді, ал Ұлыбритания, Түркия, ЕО елдері мен Мексикада пилоттық жобалар жүргізіліп жатыр.

Компанияның ЖИ шешімдері 12 тілді, соның ішінде қазақ, орыс, ағылшын, араб және испан тілдерін қолдайды.

«Microsoft for Startups бағдарламасына қатысуымыз — біз үшін серпінді даму мен жаһандық нарыққа шығуға үлкен мүмкіндік. Microsoft-тың технологиялық ресурстары мен сараптамалық қолдауы өнімдерімізді жылдам дамытуға және бизнеске нақты құндылық ұсынуға жол ашады», — деп мәлімдеді Cybernet AI негізін қалаушылардың бірі Иван Белохвостиков.

Microsoft for Startups бағдарламасы стартаптарға Azure бұлтты платформасын, жетекші техникалық сарапшылар мен менторлар қызметін, сондай-ақ жаһандық серіктестер мен инвесторлар желісіне шығу мүмкіндігін ұсынады.