Қазақстандық велоспорт бапкері Үндістанда кәмелетке толмаған спортшыны зорлады деген күдікке ілінді

Қазақстандық велоспорт бапкері Мақсат Аязбаев Үндістанда кәмелетке толмаған спортшыны зорлады деген күдік бойынша іздестіріліп жатыр. The Times of India мәліметінше, оны іздеуге бірнеше полиция тобы жұмылдырылған.

Басылым дерегіне сәйкес, болжамды қылмыс 13 қыркүйекте Патиала қаласындағы Нетаджи Субхас атындағы Ұлттық спорт институтының аумағында болған. Кәмелетке толмаған спортшы 18 қыркүйекте полицияға жүгінген.

Қазақстан велоспорт федерациясы кейінгі жылдары Аязбаевтың Қазақстаннан тыс жерде Үндістан тарапымен жасалған келісімшарт бойынша жұмыс істеп, осы елдің ұлттық құрамасын жаттықтырғанын хабарлады. Қазір оның Қазақстан құрамасына қатысы жоқ.

Федерация мәліметінше, Үндістанда қылмыстық іс қозғалған. Тергеу жүріп жатқан уақытта Аязбаевтың бапкерлік қызметі тоқтатылған.

Қазақстан Сыртқы істер министрлігі де бұл жағдайдан хабардар екенін мәлімдеді. Қазақстандық дипломаттар Аязбаевтың туыстарымен байланысып, консулдық-құқықтық көмек көрсетіп жатыр. Министрлік мәселені бақылауда ұстайтынын хабарлады.

Іс бойынша тергеу жалғасып жатыр. Аязбаевқа қатысты тағылған күдік сот үкімі шыққанға дейін оның кінәлі екенін білдірмейді.