Қазақстандық теннисші Италия ашық чемпионатында әлемнің экс-бірінші ракеткасын жеңді

Қазақстанның бірінші ракеткасы Елена Рыбакина Италия ашық чемпионатында (Internazionali BNL d’Italia) айқын басымдық көрсетіп, жарыстың ширек финалына жолдама алды. Турнирдің 1/8 финалында отандасымыз әлемдік рейтингтің бұрынғы көшбасшысы, чехиялық Каролина Плишкованы еш қиындықсыз жеңді, деп хабарлайды Kursiv.kz.

Рыбакина кездесудің алғашқы сетін небәрі 21 минут ішінде 6:0 есебімен өз пайдасына шешті. Екінші партияда Плишкова есепті теңестіруге тырысқанымен, Елена қарқынын бәсеңдетпей, ойынды 6:2 есебімен аяқтады. Жалпы есепте 58 минутқа созылған матчта қазақстандық теннисші 6 брейк жасап, соққы дәлдігі мен жылдамдығы бойынша жоғары көрсеткіштерге ие болды.

Енді жартылай финал жолдамасы үшін Елена Рыбакина турнирдің 10-шы ракеткасы, украиналық Элина Свитолинамен кездеседі. Осы уақытқа дейін екі теннисші жеті рет бетпе-бет келіп, оның төртеуінде Рыбакина жеңіске жеткен болатын. Свитолина да Римдегі бұған дейінгі үш ойынында қарсыластарына бірде-бір сет берген жоқ, бұл алдағы кездесудің тартысты болатынын көрсетеді.

Сондай-ақ, жарыстың жұптық сынында қазақстандық Анна Данилина америкалық Эйша Мухаммадпен бірге ширек финалға шығу үшін ресейлік-мексикалық дуэтпен бақ сынасады.

Айта кетейік, Елена Рыбакина - Римдегі турнирдің қазіргі чемпионы. Биылғы жарыстың жалпы сыйақы қоры 8,31 млн долларды құрайды.