Қазақстандық стартап әлем бойынша білім саласындағы үздік жоба деп танылды

Қазақстандық CodiРlay стартабы Ұлыбританияда өткен The PIEoneer Awards 2024 сыйлығына үміткер болып, "Жылдың цифрлық инновациясы" номинациясында жеңіске жетті. Бұл туралы DigitalBusiness.kz хабарлады.

Жоба оқушыларды бағдарламалауға ойын элементтері арқылы үйретуге бағытталған. Байқауға 34 елдің өкілдері қатысты.

— Бұл марапат – біздің дұрыс бағытта келе жатқанымыздың дәлелі. Жобамыз халықаралық стандарттарға сай келіп қана қоймай, әлемде білім беру технологияларын дамытуға ықпал етеді. Біз әрбір оқушыға инклюзивті, заманауи және қолжетімді білім беру мүмкіндігін ұсынуды жалғастырамыз, — деп атап өтті жобаның негізін қалаушы Жанаділ Талдыбаев.

Жақында CodiPlay Лондонда сертификаттаудан өтіп, білім беру мекемелеріне үздік шешімдерді табуға көмектесетін EdTech Impact платформасына қосылды. Сол жерде жоба "білім беру роботтары" санатында бірінші орынға ие болды және EdTech Impact платформасында "сабақтар мен ресурстар" санатындағы стартаптар арасында 15-орынға шықты.