Қазақстандық ракқа қарсы препарат қашан қолданысқа енеді?

Қазақстандық ғалымдар әзірлеген обырға қарсы препаратты тіркеу рәсімін 2026 жылы бастау жоспарланып отыр. Бұл туралы Үкіметтегі брифингте Ғылым және жоғары білім министрі Саясат Нұрбек мәлімдеді.

Министрдің айтуынша, DVC препараты Назарбаев университеті жанындағы Ұлттық зертхана базасында әзірленіп жатыр. Өткен жылы дәрі клиникалық сынақтың адамға жүргізілетін кезеңінен өткен.

Қазіргі уақытта зерттеулер Астанадағы онкологиялық орталықта жалғасып жатыр. Сонымен қатар бірқатар өңірлік онкоорталық та сынақ жұмыстарына қосылған. Министрдің сөзінше, қосымша клиникалық зерттеулер халықаралық талаптарға сай жүргізіліп жатыр.

«Биыл барлық сынақты аяқтап, препаратты тіркеуге ұсынуды жоспарлап отырмыз. Қосымша зерттеулер халықаралық регламенттерді орындау қажеттілігіне байланысты жүргізілуде», – деді Саясат Нұрбек.

Оның айтуынша, тіркеу алдымен ұлттық деңгейде жүзеге асады. Кейін халықаралық тіркеу рәсімі қарастырылады. Препарат тіркелген жағдайда, оны Қазақстандағы медициналық ұйымдарда қолдануға мүмкіндік болады.