Қазақстандық ғалымдар қатерлі ісікке қарсы қасиеті бар өсімдік тапты

Бұл туралы ҚР Ғылым және жоғары білім министрлігі хабарлады.

Әл-Фараби атындағы Қазақ ұлттық университетінің зерттеушілері Іле-Балқаш өңірінде өсетін түйетабан өсімдігін зерттеп, оның онкологиялық ауруларға қарсы белсенділігін анықтады.

Түйетабан халық медицинасында бұрыннан қолданылғанымен, ғылыми зерттеулер аз жүргізілген. ҚазҰУ ғалымдары алғаш рет өсімдіктің құрамындағы биологиялық белсенді заттарды жан-жақты зерттеп, оның антиоксиданттық, микробқа қарсы және цитотоксикалық қасиеттері бар екенін дәлелдеді.

"Өсімдіктің экстрактілері лейкоз жасушаларына қарсы белсенділік көрсетті. Бұл қатерлі ісікке қарсы жаңа препараттар әзірлеу үшін үлкен мүмкіндік береді", – деді зерттеу тобының мүшесі, докторант Гүлзат Қайранова.

Ғылыми жобаны ассоциирленген профессор Әсем Мамурова, PhD докторы Ахмет Бейатлы (Түркия) және Гүлзат Қайранова бірлесіп жүзеге асырып жатыр. Зерттеу нәтижелері негізінде ғалымдар патент алып, халықаралық ғылыми журналдарға мақала жариялауды жоспарлап отыр.