Қазақстандық әйел ел тарихында алғаш болып турист ретінде ғарышқа ұшпақ

Қазақ кәсіпкері Данна Қарағұсова тарихта тұңғыш рет Қазақстаннан ғарышқа турист ретінде сапар шеккелі отыр. Ол жақын күндері Blue Origin компаниясының New Shepard суборбиталық кемесімен ұшатын NS-36 миссиясының экипаж құрамына енді.

Компанияның мәліметінше, Қарағұсовамен бірге ғарышқа америкалық кәсіпкер Джефф Элгин, инженер Клинт Келли III, стартап негізін қалаушы Аарон Ньюман, украиналық бизнесмен Виталий Островский және аты-жөнін жарияламаған тағы бір жолаушы көтеріледі.

Instagram парақшасында Данна Қарағұсова бұл миссияны өзінің көп жылдар бойы ізденіп жүрген арманы мен ғылыми-зерттеу жобасының жалғасы екенін атап өтті:

«Адамзаттың болашағы ғарышпен байланысты. Жаңа көкжиектерді игере отырып, біз технологияларды дамытамыз әрі өз мүмкіндіктерімізді кеңейтеміз. NS-36 миссиясы – мен үшін үлкен арманға қадам», – деп жазды ол.

Қарағұсова туралы не белгілі?

Ресми деректерге сәйкес, Данна Қарағұсова 25 жылдан астам уақыт бойы медиа, дистрибуция және іс-шара ұйымдастыру саласында еңбек етіп келеді. Ол Portals атты мультимодальды экожүйенің теңқұрушысы және FMG маркетингтік холдингінің негізін қалаушы.

Сонымен қатар ол – Қазақстанның бұрынғы Еңбек және халықты әлеуметтік қорғау министрі, Сенат пен Мәжіліс депутаты болған Гүлжан Қарағұсованың қызы.

Бизнес саласынан бөлек, Данна альпинизммен де танымал: ол Килиманджаро мен Эльбрус шыңдарын бағындырған. Өзі үшін мұндай сынақтарды «ішкі күшті сынау жолы» деп бағалайды. Ал ғарышқа сапарды «адамзат эволюциясының жаңа кезеңін ашатын трансформациялық тәжірибе» деп сипаттайды.

Тарихи сапар

NS-36 миссиясы – New Shepard бағдарламасының 15-пилотталған ұшуы болмақ. Бұған дейін Blue Origin 75 адамды ғарышқа көтеріп үлгерген, оның ішінде бірнеше жолаушы екі мәрте ұшқан.

Нақты ұшу күні кейінірек жарияланады. Компания ғарыш сапарын BlueOrigin.com сайтында, әлеуметтік желілерде және YouTube-та тікелей эфирде көрсетуді жоспарлап отыр.