Қазақстандық әскерлер Иракта 4 миллионнан астам жарылғыш затты залалсыздандырды

21 қаңтарда Қазақстанда Инженерлік әскерлер күні аталып өтеді. Осы кәсіби мереке аясында Қорғаныс министрлігі қазақстандық әскери инженерлердің халықаралық миссиялардағы қызметіне ерекше назар аударды.

Қазақстандық инженерлік бөлімшелер Ирактағы бейбітшілік операциясы барысында маңызды міндеттер атқарды. Ресми деректерге сәйкес, қазақстандық саперлер мен инженер-барлаушылар 4 миллионнан астам жарылғыш затты залалсыздандырып, 6,7 мың текше метрден астам суды тазартқан. Бұл жұмыстар жергілікті халықтың қауіпсіздігін қамтамасыз етуге және инфрақұрылымды қалпына келтіруге бағытталған.

Әскери инженерлердің қызметі миналық-жарылғыш бөгеттерді анықтау және жоюмен ғана шектелмейді. Олар өткелдер ұйымдастыру, сумен қамтамасыз ету, әскери нысандарды бүркемелеу және инженерлік барлау жүргізу сияқты жоғары жауапкершілікті міндеттерді орындайды. Мұндай тапсырмалар жоғары кәсіби дайындықты, төзімділікті және заманауи техниканы тиімді пайдалануды талап етеді.

Бүгінде инженерлік әскерлер барлау құралдарымен, робототехникалық кешендермен, понтондық және жер қазу техникасымен жабдықталған. Бұл олардың тек әскери операцияларда ғана емес, сонымен қатар төтенше жағдайлардың салдарын жою кезінде де тиімді әрекет етуіне мүмкіндік береді.

Әскери инженерлер төтенше жағдайлардың салдарын жоюға да тартылады. 2024 жылғы көктемгі су тасқыны кезінде Ойыл және Есіл өзендері арқылы паром өткелдері ұйымдастырылып, 3 мыңнан астам адам эвакуацияланды, шамамен 1,5 мың техника бірлігі өткізілді және 400 тоннадан астам гуманитарлық көмек жеткізілді.