Қазақстандағы жарықтың жаппай өшуіне Қырғызстан кінәлі ме: Бішкек жауап берді

Қырғызстан Энергетика министрлігі 14 тамызда Алматы мен Қазақстанның бірнеше өңірінде жарықтың жаппай өшуіне елдің энергетикалық жүйесін кінәлау дұрыс емес деп мәлімдеді. Ведомство апаттың нақты себебін арнайы комиссия анықтайтынын хабарлады.

Қырғыз тарапы 14 тамызда Тоқтоғұл су электр станциясындағы екі гидрогенератордың қысқа уақытқа ажырағанын растады. Министрлік мұны Орталық Азияның біртұтас энергетикалық жүйесіндегі кейінгі өзгерістерге түрткі болған бастапқы ақау деп атады. Алайда бұл жағдайды Қазақстандағы электр қуатының жаппай өшуіне тікелей себеп деп қарастыруға болмайтынын мәлімдеді.

«Алматы энергетикалық торабы Орталық Азияның біртұтас энергетикалық жүйесіндегі жиілік қалыпты көрсеткішке келгеннен кейін ажырады», – делінген Қырғызстан Энергетика министрлігінің хабарламасында.

Ведомство мәліметінше, қырғыз энергетиктері ақаудан кейін 18 минут ішінде жүйедегі жиілікті қалыпты деңгейге келтірген. Сонымен қатар Қырғызстан көрші елдердің энергетикалық жүйелеріне шамамен 250 МВт қуат берген.

«Бірлескен техникалық тергеу аяқталғанға дейін апаттың кейінгі барлық салдары үшін Қырғызстанның энергетикалық жүйесіне жауапкершілік жүктеу дұрыс емес», – деп мәлімдеді министрлік.

Бұған дейін KEGOC 14 тамызда сағат 14:37-де Қырғызстандағы Тоқтоғұл су электр станциясының екі гидрогенераторы ажырағанын хабарлаған. Компания мәліметінше, соның салдарынан Қазақстанның Солтүстік – Шығыс – Оңтүстік бағытындағы электр желісіне шамадан тыс күш түсіп, оңтүстік аймақ елдің бірыңғай электр энергетикалық жүйесінен және Орталық Азияның біртұтас энергетикалық жүйесінен бөлініп қалған.

Апат салдарынан Алматы, Жамбыл, Түркістан, Қызылорда, Қарағанды облыстарында, сондай-ақ Ұлытау, Абай және Жетісу облыстарында тұтынушылар жарықсыз қалды. Электр қуаты сол күні кезең-кезеңімен толық қалпына келтірілді.

Алматы мен Алматы облысында жарық сағат 14:38-де өшкен. «Алатау Жарық Компаниясының» мәліметінше, KEGOC-қа тиесілі жоғары кернеулі үш электр желісі апаттық жағдайда ажырап, соның салдарынан апатқа қарсы автоматты жүйе іске қосылған.

14 тамызда электр қуаты Душанбеде де үзілген.