Қазақстандағы ең ірі мұнай кенішінде өндіріс көлемі күрт төмендеді

Қазақстандағы ең ірі мұнай кен орны – Теңіз кен орны аумағындағы нысандардың бірінде өндірістік ақау тіркелді. Бұл туралы жобаның операторы Теңізшевройл компаниясы хабарлады.

Компания мәліметінше, оқиға 28 мамыр күні болған. Қазір мұнай өндіру көлемін қалпына келтіру жұмыстары жүргізіліп жатыр. ТШО қауіпсіз әрі сенімді өндірісті қамтамасыз ету басты басымдық екенін атап өтті. Алайда компания өндірістік қызмет пен коммерциялық мәселелерге қатысты егжей-тегжейлі ақпарат беруден бас тартты.

Сонымен қатар Reuters агенттігі өз дереккөздеріне сілтеме жасап, 26 мамыр күні Теңіз кен орнында мұнай өндіру көлемі күрт төмендегенін хабарлады. Агенттік мәліметінше, тәуліктік өндіріс көлемі әдеттегі 125 мың тоннадан 5-10 мың тоннаға дейін азайған. Дереккөздер мұны өндірістегі апатпен байланыстырған.

Reuters мәліметінше, өндірісті қалпына келтіру бірнеше күнге созылуы мүмкін. 27 мамырдағы жағдай бойынша тәуліктік өндіріс шамамен 82 мың тоннаға дейін қайта өскен.

Теңіз – Қазақстандағы ең ірі мұнай кен орны. Жобаны ТШО жүзеге асырады. Компания акционерлері қатарында Chevron, ExxonMobil, ҚазМұнайГаз және Лукойл бар.