Қазақстандағы АЭС құрылысының құны $16,4 млрд болады

Қазақстандағы алғашқы атом электр станциясының құрылысы шамамен $16,4 млрд болады. Бұл туралы бейсенбі күні Атом энергиясы агенттігінің төрағасы Алмасадам Сәтқалиев мәлімдеді. 

Сәтқалиевтің айтуынша, жобаның басым бөлігі – шамамен $14,4 млрд – екі энергоблокты салуға жұмсалмақ. Бұдан бөлек, тағы $2 млрд-қа жуық қаражат қауіпсіздік жүйелерін орнатуға, әлеуметтік және инженерлік инфрақұрылымды дамытуға, сондай-ақ кепілдік кезеңіне арналған ядролық отын қорына бағытталады. Оның сөзінше, инфрақұрылымды қоса алғандағы алдын ала есеп бойынша жобаның жалпы құны шамамен $16,5 млрд-ты құрайды.

Жобаны қаржыландыру экспорттық несие тетігі арқылы іске асырылмақ. Бұған дейін Алмасадам Сәтқалиев жоба шығындарының 85%-ын Ресей тарапы несие ретінде ұсынуы мүмкін екенін, ал қалған 15%-ын Қазақстан үкіметі жабатынын мәлімдеген еді. Алғашқы энергоблокты  қолданысқа енгізу 2034 жылға белгіленген. Балқаш көлі маңындағы аумақта инженерлік және жобалық-іздестіру жұмыстары аяқталғаннан кейін, АЭС құрылысы 2027 жылы басталады деп жоспарланып отыр. 

«Орта есеппен мұндай құрылыс 10 жылға дейін созылады. Алайда әріптестерімізбен жасалған келісімге сәйкес, алғашқы бетон құйылғаннан кейін жеті жыл ішінде, яғни 2034 жылы бірінші блокты іске қосуды күтіп отырмыз», – деді агенттік басшысы. 

Бұған дейін Сәтқалиев екі қуаты 1200 мегаватт болатын блоктың құрылысы шамамен $15 млрд болады деп айтқан. Ал өткен жылы жоба құны $14 млрд деп бағаланған еді. 

Қазақстандағы алғашқы АЭС құрылысын жүзеге асыратын халықаралық консорциумның жетекшісі ретінде «Росатом» таңдалды. Ведомствоаралық комиссия ресейлік компанияның ұсынысын ең тиімді әрі оңтайлы деп таныған. 

Владимир Путиннің Астанаға мемлекеттік сапары аясында бейсенбі күні Қазақстан мен Ресей үкіметтері АЭС салу бойынша ынтымақтастық жөніндегі келісімге қол қойды.

Жарылқасын Шұғыла