Қазақстанда жүректі 24 сағаттан астам уақыт тірі сақтайтын бірегей құрылғы жасалды

Қазақстанда донорлық жүрек пен басқа да органдарды денеден тыс ұзақ уақыт – 24 сағаттан астам уақыт бойы тірі және сау күйде сақтауға мүмкіндік беретін ALEM атты ерекше медициналық құрылғы жасалды. Бұл – отандық медицина саласындағы тың жаңалық әрі трансплантация саласындағы үлкен серпіліс.

Бұл құрылғыны Қазақстандағы танымал кардиохирург Юрий Пя бастаған команда Heart Center Foundation ұйымымен бірлесіп жасап шығарды. Жоба еліміздегі трансплантологияны жаңа деңгейге көтеруге бағытталған.

Дәстүрлі түрде донорлық органды трансплантациялау кезінде оның өміршеңдігі тек 4-6 сағатқа дейін ғана сақталады. Қазақстан сияқты үлкен, алыс қашықтықтары бар ел үшін бұл – ауыртпалық әрі қиындық тудырады. ALEM құрылғысы осы уақытты едәуір ұзартып, өміршең органды ұзақ әрі сенімді түрде тасымалдауға мүмкіндік береді.

ALEM-нің мүмкіндіктері:

Органды тірі күйінде сақтайды

Температураны 36–37 °C аралығында ұстап тұрады

Медикаменттер енгізу, сондай-ақ ультрадыбыстық зерттеу (УДЗ) мен компьютерлік томография (КТ) жасауға мүмкіндік береді

Көлік, пойыз және ұшақпен тасымалдау үшін қолайлы

Қазіргі уақытта бұл құрылғы 42 клиникада зерттеліп, сынақтары сәтті өткен. Енді ALEM шынайы трансплантацияда қолдануға дайындық кезеңінде тұр.

Алдағы уақытта құрылғының алғашқы өндіріс желісін іске қосу көзделуде. Бұл қадам Қазақстанның трансплантология саласындағы өзіндік брендке айналуына жол ашады.