Қазақстанда әлеуметтік желі қолданушыларының жасын жасанды интеллект тексереді

Қазақстан Үкіметі 16 жасқа толмаған пайдаланушылардың онлайн-платформаларда тіркелуін реттеу үшін заңнамаға түзетулер дайындады. Премьер-министр Олжас Бектеновтің айтуынша, жаңа ережелер аясында жасөспірімдердің қолданыстағы аккаунттары уақытша тоқтатылуы мүмкін.

Қазіргі уақытта бұл заң жобасын Құрылтай қарап жатыр. Құжат қабылданғаннан кейін Мәдениет және Жасанды интеллект министрліктері пайдаланушылардың жасын растаудың арнайы ережелерін әзірлейді.

Бұл орайда пайдаланушының жасын тексеру үшін жасанды интеллект (ЖИ) технологияларын қолдану жоспарлануда. Цифрлық жүйе пайдаланушының жасын бет-әлпетінің суреті, парақшадағы контенті, жазылымдары мен белсенділігі арқылы анықтай алады. Ең бастысы, бұл механизмдер жеке деректерді жария етпей-ақ жасты дәл анықтауға мүмкіндік беруі тиіс.

«Жаңа талаптарды енгізу үшін өтпелі кезең қарастырылады. Сонымен қатар 16 жасқа толмаған пайдаланушылардың қолданыстағы аккаунттарын уақытша тоқтата тұру мүмкіндігі де қарастырылады», — деп атап өтті Олжас Бектенов.

Бұл ережелер Қазақстандағы әлеуметтік желілердің ресми өкілдіктерімен талқыланып, шектеудің нақты механизмдері Құрылтай депутаттарымен бірге арнайы жұмыс топтарында пысықталады.

Еске салсақ, бұған дейін Мемлекет басшысы балалардың әлеуметтік желілерді пайдалануына қатысты өз ұстанымын білдірген болатын. Президент цифрлық платформалар мен ЖИ жастардың дүниетанымына үлкен әсер ететінін айтып, 16 жасқа толмағандарға әлеуметтік желіде тіркелуге тыйым салу идеясын қолдаған еді.