Қазақстанда жатақханада тұратын кейбір студенттерге 100 мың теңгеге жуық өтемақы төленуі мүмкін

Қазақстанда студенттердің жекелеген санаттары үшін жатақханада тұру шығындарын өтеуге арналған арнайы қаржылай көмек қарастырылған. Төлем мөлшері жыл сайын 29 айлық есептік көрсеткішке (АЕК) дейін жетіп, 100 050 теңгені құрайды. Бұл туралы Ғылым және жоғары білім министрлігі Жоғары және жоғары оқу орнынан кейінгі білім комитеті төрағасының орынбасары Ақерке Абылайхан Jibek Joly телеарнасының «Бүгін Live» бағдарламасында мәлімдеді.

Мемлекеттік қолдау аясында берілетін бұл өтемақы әлеуметтік жағынан осал топтағы студенттердің жүктемесін жеңілдетуге бағытталған. Атап айтқанда, бұл көмекке ата-анасының қамқорлығынсыз қалған жетім балалар, І және ІІ топтағы мүгедектігі бар студенттер, сондай-ақ бала кезінен мүгедектігі бар білім алушылар ие бола алады.

Ведомство өкілінің сөзінше, бұл төлемдер тек бірінші курс студенттеріне ғана емес, оқудың екінші және үшінші курстарында да тұрақты түрде төленеді.

Үкіметтің ресми мәліметтеріне сәйкес, бұл бағдарлама бойынша жалпы 7 145 студентке қаржылай өтемақы төлеу жоспарланған. Олардың ішінде 4 651 білім алушы - ата-ана қамқорлығынсыз қалған жетім студенттер.