Қазақстанда жаңа ерекше мереке пайда болды

Қазақстан Республикасының Үкіметі мерекелік күндер тізбесіне толықтырулар енгізу туралы қаулы қабылдады. Енді жыл сайын 3 қыркүйекте ұлттық мақтанышымыз саналатын қазақ иттерінің тұқымдары ұлықталады.

Үкіметтің тиісті қаулысы 2026 жылғы 28 сәуірден бастап қолданысқа енгізіледі. Жаңа мерекенің белгіленуі - қазақ халқының материалдық емес мәдени мұрасын сақтауға, тазы мен төбет тұқымдарын халықаралық деңгейде насихаттауға және отандық кинология саласын дамытуға бағытталған маңызды қадам.

Айта кетейік, 2024 жылғы 3 қыркүйекте Амстердамда өткен Халықаралық кинологиялық федерацияның (FCI) отырысында «қазақ тазысы» тұқымын алдын ала мойындау және Қазақстанға тұқым стандартын ұстаушы мәртебесін бекіту туралы тарихи шешім қабылданған болатын. Тұқымды толыққанды халықаралық тіркеуден өткізу үдерісі 2034 жылға дейін жалғаспақ.

Мереке аясында жыл сайын мынадай шараларды өткізу жоспарланған:

• Халықаралық және республикалық ит көрмелері мен жарыстары;

• Тазы мен төбеттің шығу тарихына арналған ғылыми-практикалық семинарлар;

• Тұқым асылдандырушылар мен кинологиялық ұйымдар арасындағы тәжірибе алмасу форумдары.

Еске сала кетсек, қазақ тазысы мемлекеттік деңгейде де ерекше назарға ие. Президент Қасым-Жомарт Тоқаевтың Франция Президенті Эмманюэль Макронға сыйлаған Жюль мен Жанна есімді тазылары бүгінде еуропалық жұртшылық арасында қазақтың ұлттық құндылығын танытып келеді.