Қазақстанда жалақы өсіп, несие жүктемесі төмендейді – Жұманғарин

Премьер-министрдің орынбасары – Ұлттық экономика министрі Серік Жұманғарин Үкімет отырысында Мемлекет басшысының экономикалық өсудің жаңа моделіне көшу жөніндегі тапсырмасын орындау аясында қабылданып жатқан шаралар туралы баяндады.

Оның айтуынша, Үкіметтің негізгі мақсаты – халықтың нақты табысын арттыру, экономиканың тұрақты өсімін қамтамасыз ету және оның бәсекеге қабілеттілігін күшейту. Осы мақсатта Үкімет Ұлттық банк пен Қаржы нарығын реттеу және дамыту агенттігімен бірлесіп 2026–2028 жылдарға арналған Макроэкономикалық тұрақтандыру және халықтың әл-ауқатын арттыру бағдарламасын жүзеге асырып жатыр. Сонымен қатар биыл халықтың табысын арттыруға арналған жеке бағдарлама қабылданған.

Министрдің сөзінше, елде жалақыны кезең-кезеңімен өсіру, сапалы жұмыс орындарын ашу, азаматтардың борыштық жүктемесін азайту және кәсіпкерлікті қолдау бағытында кешенді шаралар қолға алынады. Сондай-ақ қарсы міндеттемелер тетігі арқылы ең төменгі жалақы мөлшерін, азаматтық қызметшілер мен жалдамалы жұмыскерлердің еңбекақысын көтеру мәселесі қаралады.

Үкімет тұтынушылық несиенің өсуі мен халықтың кредиттік жүктемесін азайтуға ерекше назар аударып отыр. Негізгі мақсат – халықтың нақты табысының өсімін жыл сайын 2–3 пайыздан жоғары деңгейде қамтамасыз ету.

Жұманғариннің айтуынша, бұл міндеттерге экономиканың сапалы әрі тұрақты өсімі, сондай-ақ инфляцияны төмендетуге бағытталған шаралар арқылы қол жеткізу жоспарланып отыр.