Қазақстанда WhatsApp чаттары арқылы жұмыс істеген жаңа қаржы пирамидасы анықталып, тергеу басталды

Қазақстандықтар тағы да оңай олжаға алданып, ірі алаяқтық схеманың құрбаны болды. Бұл жолы алаяқтар халықты заманауи технологиялармен арбаған. Қаржылық мониторинг агенттігі (ҚМА) Жамбыл облысында «ENVIDA AI» деп аталатын жаңа қаржы пирамидасын құру және оны басқару дерегі бойынша ауқымды тергеу амалдарын бастады.

Пирамиданы ұйымдастырушылар жарнама кампаниясын жүргізу үшін ешқандай кеңсе де ашпаған. Олар өз құрығын қарапайым әрі әр адамның телефонында бар WhatsApp чаттары арқылы жүргізген. Топтарға қосылған азаматтарға ешқандай тәуекелсіз, тұрақты әрі өте жоғары табыс табу мүмкіндігі уәде етілген.

Бұл жоба өзін жай ғана компания емес, «нақты активтерге инвестиция салатын халықаралық экосистема» ретінде таныстырған. Атауындағы «AI» (жасанды интеллект) сөзі де заман ағымына сай халықтың сеніміне кіру үшін арнайы таңдалған айла болып шықты.

Қаржылық мониторинг агенттігінің мәліметінше, жобаның маркетингтік моделі көпдеңгейлі жүйеге, яғни кәдімгі пирамида принципіне негізделген:

«Мұндағы негізгі табыс ешқандай инвестициядан емес, тек қана жүйеге жаңадан қосылған салымшылардың есебінен қалыптасып отырған. Шақырған адамың көп болған сайын, табысың да артады деген жалған уәде берілген».

Алаяқтардың құрығы өте кең жайылған. Бүгінгі таңда тергеу барысында бұл алаяқтық схемаға Қазақстанның бірнеше өңірінен 370-тен астам салымшы ақша құйғаны анықталды. Жәбірленушілердің басым бөлігі мына аймақтардан:

•  Ақтөбе облысы
• Атырау облысы
• Қызылорда облысы
• Павлодар облысы
• Түркістан облысы
• Алматы қаласы

Қазіргі уақытта бұл іске қатысты тергеу амалдары қызу жүріп жатыр. Агенттік зардап шеккен азаматтардың нақты санын анықтап, келтірілген шығын көлемін есептеуде. Жобаның басты ұйымдастырушыларын заң бойынша қатаң жаза күтіп тұр.