Қазақстанда вакцинадан бас тарту 8 жылда 5 есеге жуық артқан

Қазақстанда вакцинациядан бас тарту жағдайлары соңғы сегіз жыл ішінде 4,8 есе артқан. Бұл туралы Денсаулық сақтау министрлігінің баспасөз қызметі хабарлады.

Ведомство мәліметінше, елде қызылшаға шалдыққандар саны өсіп отыр. 2026 жылдың басынан бері республика бойынша қызылшаның 4 184 жағдайы тіркелген. Ауру жұқтырғандардың 83,8%-ы – 14 жасқа дейінгі балалар.

Өткен аптада сырқаттану деңгейі алдыңғы кезеңмен салыстырғанда 1,3 есеге артқан.

ДСМ дерегіне сәйкес, қызылшамен ауырғандардың 77%-ы екпе алмаған адамдар. Ал вакцина алмаудың негізгі себебі – ата-аналардың бас тартуы. Мұндай жағдайлар 55% жағдайда тіркелген.

Министрлік вакцинация аурудың ауыр асқынуларының алдын алудың ең тиімді тәсілі екенін атап өтті.

Қазіргі уақытта ел аумағында инфекция ошақтарын оқшаулау және аурудың таралуын болдырмау мақсатында эпидемияға қарсы ауқымды шаралар жүргізіліп жатыр. Балаларды жоспарлы және қосымша вакцинациялау жалғасуда, ал науқаспен байланыста болған адамдарға шұғыл екпе салынады.

Сонымен қатар байланыста болған адамдар 21 күн бойы медициналық бақылауға алынады. Балабақшаларда қызылша тіркелген жағдайда вакцина алмаған балалардың келуі уақытша шектеледі.

Иммунопрофилактика мәселелері жөніндегі республикалық штаб отырыстарында өңірлік денсаулық сақтау департаменттерінің есептері қаралып жатыр. Мысалы, Жамбыл облысында иммундық препараттарды сатып алуға қосымша қаражат бөлінген.

ДСМ мәліметінше, барлық өңірде медицина қызметкерлері үшін вакцина арқылы басқарылатын инфекцияларды анықтау және пациенттерді емдеу мәселелері бойынша 4 мыңнан астам семинар өткізілген.

Ведомство вакцинадан бас тарту жағдайларының көбеюі ұжымдық иммунитеттің төмендеуіне әкеліп, эпидемиологиялық ахуалды толық тұрақтандыруға кедергі келтіріп отырғанын атап өтті.