Қазақстанда ҰҚШҰ аясында бірлескен жаттығулар өтеді

Ұжымдық қауіпсіздік туралы шарт ұйымы (ҰҚШҰ) 2026 жылы Қазақстан аумағында әскери оқу-жаттығу өткізуді жоспарлап отыр, деп хабарлады Ресей қорғаныс министрлігінің баспасөз қызметі.

Мәліметке сәйкес, ұйымға мүше елдердің бас штаб өкілдері бірлескен жедел және жауынгерлік дайындықты ұйымдастыру мәселелерін талқылаған. Биыл мұндай жаттығулар Ресей, Беларусь және Қазақстан аумағында өтеді.

Жиын барысында қатысушылар өңірдегі әскери-саяси жағдайды қарастырып, ұйымның әскери әлеуетін арттыруға бағытталған нақты қадамдарды айқындаған. Сондай-ақ әуе қорғанысын жетілдіру және әскери кадрларды даярлау мәселелеріне басымдық берілген.

Ресей Қарулы күштері Бас штабының бастығы Валерий Герасимов ұйым аясындағы басқару жүйесін жетілдіру және бірлескен күштердің үйлесімділігін арттыру бағытында келісімдер жасалғанын атап өтті.

Сонымен қатар Қазақстанның БҰҰ бітімгерлік миссияларына қатысу тәжірибесі қаралған. Жиын қорытындысы ұйымға мүше елдердің әскери қауіпсіздігін нығайтуға ықпал етеді деп күтілуде.