Қазақстанда тегін берілуі тиіс 15 мың қаптама дәрі-дәрмек заңсыз сатылған

Қазақстан Республикасы Денсаулық сақтау министрлігінің баспасөз қызметі елдегі дәрі-дәрмек айналымындағы ірі заңсыздықтарды әшкереледі. Тауарларды таңбалау мен қадағалаудың цифрлық жүйесі мемлекет есебінен тегін берілуі тиіс препараттардың дәріханаларда заңсыз сатылғанын анықтады.

Тегін дәрілердің саудалануы: Мемлекеттік бюджет есебінен сатып алынған және халыққа ТМККК (Тегін медициналық көмектің кепілдік берілген көлемі) аясында тегін берілуі тиіс 15 мыңнан астам қаптама дәрі-дәрмек бөлшек саудада сатылған.
 
Жүйе 6,5 мыңнан астам таңбалау кодының қайталанғанын тіркеді. Бұл кодтар жалпы саны 385 мың реттен астам қайта қолданылған.

Сонымен қатар пайдалану мерзімі өтіп кеткен 750-ден астам дәрілік заттың сатылымға шыққаны белгілі болды.
2024 жылдың шілдесінен бастап міндетті түрде енгізілген дәрі-дәрмекті таңбалау жүйесі әрбір қаптаманың өндірушіден пациенттің қолына жеткенге дейінгі жолын нақты уақыт режимінде бақылауға мүмкіндік береді.

"Тауарларды таңбалау мен қадағалаудың бірыңғай операторының деректері бойынша, платформа кез келген аномалия мен заңсыз әрекетті бірден анықтайды. Бұл «көлеңкелі» нарықпен күресудің және халықтың қауіпсіздігін қамтамасыз етудің тиімді құралына айналды", – делінген ресми хабарламада.

Қазіргі таңда Денсаулық сақтау министрлігінің Медициналық және фармацевтикалық бақылау комитеті Бас прокуратурамен бірлесіп, заң бұзушылықтар орын алған нысандарда жоспардан тыс тексерулер жүргізуде. Кінәлі тұлғаларға қатысты қатаң әкімшілік және қылмыстық шаралар қолданылатын болады.

Еске сала кетейік, қатардағы азаматтар кез келген дәрінің заңдылығын Naqty Onim мобильді қосымшасы арқылы қораптағы кодты сканерлеу арқылы тексере алады.