Қазақстанда тағы бір тіл ресми мәртебе алуы мүмкін: Сенсациялық заң жобасы қолдау тапты

Қазақстанның құқықтық кеңістігінде сенсациялық бетбұрыс орын алуы мүмкін. Осы уақытқа дейін қоғам назарынан тыс қалып, заң жүзінде мойындалмаған ерекше тілге ақыры ресми мәртебе берілмек. Мәжілістің жұмыс тобы ым-ишара (жестовый) тілін заңнамалық деңгейде бекіту туралы түзетулерді бір ауыздан қолдап, Үкіметтен де жасыл жарық жанды. Бұл - еліміздегі мыңдаған жанның өмірін түбегейлі өзгертетін тарихи сәт.

Бүгінде Қазақстанда есту және сөйлеу қабілеті бұзылған 30 мыңнан астам адам тұрады, оның 5 мыңға жуығы - балалар. Олар бізбен бір қоғамда өмір сүргенімен, осы күнге дейін олардың төл тілі заң жүзінде өмір сүрмеген сияқты еді.

«Құрғақ цифрлардың артында әрқашан шынайы тағдырлар тұрады. Адамның ауруханада өз дертін түсіндіре алмауы, мемлекеттік қызметті ала алмауы, ең бастысы — қоғамға дауысын жеткізе алмауы өте ауыр», - деп ашынды Мәжіліс депутаты Екатерина Смолякова.

Бұл бастаманың тууына Қазақ саңыраулар қоғамының жетекшісі Сайлаугүл Омарханова мен «Respublica» партиясының төрағасы Айдарбек Қожаназаровтың кездесуі түрткі болған. Онда ерекше жандардың сотта, медицинада, білім беруде кездесетін күнделікті тозақтай қиындықтары мен сурдоаудармашылардың тым тапшылығы ашық айтылды. Мұнан соң мәселе нақты заң жобасына айналды. Депутат Нұргүл Тау түзетулер енгізіп, Екатерина Смолякова бұл тақырыпты Парламент мінберінен өткір көтерді.

Бұл мәселені шешудің алғашқы кезеңі 2025 жылдың мамыр айында басталған болатын. Сол уақытта Премьер-министрдің орынбасары Ермек Көшербаев депутаттық сауалға берген жауабында Үкімет тарапынан осы бағыттағы халықаралық тәжірибе зерттеліп, дайындық жұмыстары жүргізіліп жатқанын хабарлаған еді.

Қазіргі уақытта заң жобасы жұмыс тобы мен Үкімет тарапынан қолдау тапты. Құжат Мәжілістің жалпы отырысында қаралып, соңғы қабылдау рәсімдерінен өтуі тиіс. Заң жобасы күшіне енген жағдайда, есту және сөйлеу қабілеті бұзылған азаматтардың мемлекеттік қызметтер мен бейімделген контентке қолжетімділігі заң жүзінде қамтамасыз етіледі.