Қазақстанда суррогат аналардың шетелдіктерге бала тууына тыйым салынбақ

Қазақстанда суррогат ана қызметін пайдалануға тек ел азаматтарына рұқсат беру жоспарланып отыр. Тиісті өзгерістерді «Неке және отбасы туралы» кодекске енгізу көзделген. Бұл туралы Премьер-министрдің орынбасары Қанат Бозымбаев Мәжіліс депутаттарының сауалына берген жауабында мәлімдеді.

Қазіргі қолданыстағы заңнамаға сәйкес, суррогат ана қызметіне Қазақстан азаматтары да, шетелдіктер де жүгіне алады. Алайда халықаралық тәжірибеде бұл салада түрлі даулы жағдайлар мен сот процестері жиі тіркеліп отырғаны айтылды.

Осыған байланысты Қазақстан аумағында суррогат ана қызметтерін тек Қазақстан Республикасының азаматтарына ғана көрсету жөніндегі норманы заңмен бекіту ұсынылып отыр. Үкімет мұндай қадам құқықтық тәуекелдерді азайтуға бағытталғанын атап өтті.

Қанат Бозымбаевтың түсіндіруінше, Денсаулық сақтау министрлігі «Неке және отбасы туралы» кодекске енгізілетін тиісті түзетулерді әзірлеп қойған. Қазір құжат мүдделі мемлекеттік органдармен келісу кезеңінде.

Келісу рәсімдері аяқталғаннан кейін заң жобасы белгіленген тәртіппен Парламент қарауына енгізілмек.

Айта кетейік, бұл мәселені Мәжіліс депутаттары 2025 жылғы желтоқсанда көтеріп, Үкіметке ресми сауал жолдаған болатын. Ал биыл жыл басында Премьер-министрдің орынбасары аталған тақырып бойынша арнайы жиын өткізген.