Қазақстанда сотталғандарға смартфон пайдалануға рұқсат берілуі мүмкін

Ішкі істер министрлігі сотталғандардың құқықтық жағдайына қатысты өзгерістер жобасын «Ашық НҚА» порталында жариялады. Құжатқа сәйкес, ең төменгі қауіпсіздік деңгейіндегі мекемелерде жазасын өтеп жатқан азаматтарға мекемеден тыс жерде смартфон пайдалануға рұқсат беру ұсынылып отыр.

Өзгерістер тек колония-қоныстарға қатысты. Жоба аясында сотталғандарға мекемеден тыс смартфон қолдануға мүмкіндік беру, мінез-құлқы үшінші оң дәрежеге жеткендерге «тыныш сағат» енгізу, сондай-ақ кездесуге және қалаға шығуға өтінішті терминал арқылы жолдау тетігін іске қосу қарастырылған. Соңғысы сыбайлас жемқорлық тәуекелдерін азайтуға бағытталған.

Құжат 11 наурызға дейін қоғамдық талқылауға шығарылды.

Айта кетейік, ең төменгі қауіпсіздік деңгейіндегі мекемелерде абайсызда қылмыс жасағандар немесе алғаш рет жеңіл санаттағы құқықбұзушылық үшін сотталғандар жазасын өтейді. Бұл – оқшаулау деңгейі төмен мекемелер. Мұнда сотталғандарға азаматтық киім киюге, отбасымен бірге тұруға және мекемеден тыс жерде жұмыс істеуге рұқсат етіледі.