Қазақстанда шетелден әкелінген телефондар бұғатталып жатыр

Қазақстанда шетелден әкелінген ұялы телефондарды тіркеу мәселесіне қатысты шағымдар көбейіп отыр. Әсіресе Ресей, Қырғызстан және Өзбекстаннан жеткізілген смартфондарды тіркеу кезінде қиындықтар туындауда. Бұл туралы «31 арна» хабарлады.

Саудагерлердің айтуынша, жүйе IMEI-кодтарды қабылдамай, салдарынан тек жаңа құрылғылар ғана емес, 4–5 жыл бұрын сатылған телефондар да істен шығып жатыр. Кәсіпкерлер тіркеу рәсімі формалды түрде тегін болғанымен, оның күрделі екенін алға тартады. Осыған байланысты кей азаматтар құрылғысын тіркету үшін үшінші тұлғаларға 30–50 мың теңге аралығында қаражат төлеуге мәжбүр.

Сондай-ақ кәсіпкерлердің сөзінше, құрылғыға екінші SIM-карта орнатылған кезде жүйе қосымша верификациядан өтуді талап етеді. Егер бұл рәсім орындалмаса, телефон «сұр тізімге» енгізіліп, бір ай ішінде бұғатталады. Мұндай жағдайға тап болған тұтынушылар қайда жүгінерін білмей отыр.

Қазіргі таңда Қазақстанда ұялы телефондарды тіркеумен жеке меншік «ATS Mediafon KZ» ЖШС айналысады. Алайда кәсіпкерлер компанияның өтінім қабылдайтын сайты тұрақсыз жұмыс істейтінін мәлімдеуде. Өз кезегінде компания өкілдері бұл пікірмен келіспейді.

Компанияның коммерциялық директоры Мади Шеримнің айтуынша, телефонның бұғатталуы оның өндірілген еліне байланысты емес. Құрылғының заңды түрде әкелінгенін растайтын құжаттар ұсынылған жағдайда, верификация кедергісіз жүзеге асырылады. Ал кедендік тіркеусіз және тиісті төлемдерсіз әкелінген телефондар тіркелмейді. Жеке тұлғалар үшін тіркеу тегін болса, кәсіпкерлер әр құрылғы үшін 4325 теңге көлемінде төлем жасайды.

Компания кәсіпкерлермен ашық диалог жүргізуге дайын екенін мәлімдеді. Ал сатушылар тіркеу процесін мемлекеттік органның құзыретіне беруді талап етуде.