Қазақстанда сапасыз жол учаскелері үшін ақы алынбайды: жолдардың тізімі жарияланды

Қазақстан Республикасының Көлік министрлігі жол жамылғысында ақауы бар ақылы автожолдардың кейбір учаскелерінде уақытша төлем алынбайтын тізбенің жобасын дайындады.

2025 жылғы 15 қыркүйектен бастап елімізде республикалық маңызы бар автожолдарда төлем алу қағидалары өзгертілді. Енді жүргізушілер көлік қозғалысының қауіпсіздігі мен жайлылығына кедергі келтіретін ақауы бар жол учаскелері үшін ақы төлемейді.

Жолдардың техникалық жағдайын тексеру нәтижесінде мұндай учаскелер Абай, Ақмола, Ақтөбе, Алматы, Жетісу, Батыс Қазақстан, Қарағанды, Қостанай, Қызылорда, Павлодар, Солтүстік Қазақстан және Түркістан облыстарындағы автожолдардан анықталған.

(Тізімді осы жерден көре аласыз)

«Бұл тізім арнайы бұйрықпен бекітіледі. Қазіргі уақытта бұл – жоба, сондықтан оған өзгерістер енгізілуі мүмкін», – деп нақтылады Көлік министрлігі.

Ақауы бар жол учаскелерінің жалпы ұзындығы 184 шақырымнан асады. Бұл аумақтарда асфальт және цемент-бетон жамылғыларының шөгуі, жол табанының ойысуы, қабыршақтану, тегіс еместік, шұңқырлар мен жарықтар анықталған. Кейбір автожолдарда кемшіліктер екі бағытта бірдей тіркелген.

Аталған учаскелер толық жөнделіп, талапқа сай жағдайға келтірілгенге дейін оларда жолақы алынбайды.

Бұған дейін Көлік министрлігі Қазақстандағы ауылдарға апаратын сапасыз кірме жолдар мәселесі қалай шешілетінін хабарлаған болатын.