Паспортты онлайн қайта рәсімдеу қашан іске қосылады: Министрлік жауабы

Қазақстандықтардың паспортты онлайн форматта қайта ауыстыру мүмкіндігі қашан пайда болатыны белгілі болды. Бұл туралы Жасанды интеллект және цифрлық даму бірінші вице-министрі Ростислав Коняшкин Үкіметте өткен брифингте айтып берді.

Бұған дейін жыл басында аталған қызметті биыл енгізу жоспарланғаны хабарланған еді. Дегенмен ведомство өкілдері бұл процесті жеке куәлікті онлайн қайта рәсімдеу бойынша жүріп жатқан пилоттық жоба толық аяқталғанға дейін уақытша кейінге қалдыруды жөн көрген.

«Бұл қызметті толық идеалды деңгейге жеткізгеннен кейін барып, құжаттардың басқа түрлерін, соның ішінде паспортты және жеке куәліктің өзге де түрлерін қайта қарастырамыз деп шештік. Қазіргі уақытта бұл қызмет тек құжаттың мерзімі өткен жағдайда қолжетімді. Кейіннен құжатты жоғалту немесе тегін ауыстыру жағдайлары бойынша да қарастыратын боламыз», - деді Ростислав Коняшкин.

Сонымен қатар вице-министр паспортты онлайн қайта рәсімдеу қызметі осы жылдың соңына дейін іске қосылуы мүмкін екенін де жоққа шығарған жоқ.