Қазақстанда өзін аурудан сақтандыратындар көбейді

Жыл басынан бері аурудан сақтандырылған азаматтарға 30 миллиард теңге төленді. Бұл өткен жылмен салыстырғанда 20%-ға көп, деп хабарлады 24.kz.

Сақтандыру төлемдері негізінен созылмалы сырқатқа шалдыққандарға беріледі. Мұндай сақтандыру көлемі 25%-ға өсіп, 62,8 миллиард теңгеге жеткен. Азаматтар денсаулықты сақтандыру шарттарын жеке немесе топтық түрде рәсімдей алады. Мұндай шарттар төлемді Қазақстан аумағында да, шетелде де пайдалануға мүмкіндік береді.

Тұтынушылар сақтандыру арқылы жедел медициналық көмекке, зертханалық-аспаптық зерттеулерге, стоматологиялық қызметтерге және басқа да медициналық көмек түрлеріне қол жеткізе алады.

Қазақстанда соңғы бес жылда сақтандыру компанияларының активі екі есе артып, 1,5 трлн теңгеге жетті. Сонымен қатар сақтандыру жағдайы бойынша төлемдер де 21 миллиардтан 91 миллиард теңгеге дейін өсті.

Қаржы нарығын реттеу және дамыту агенттігінің мәліметінше, өтемақылардың негізгі бөлігі қызметкерлерді жазатайым оқиғалардан сақтандыру және өмірді ерікті сақтандыру қызметтері арқылы төленеді.

Жалпы сақтандыру саласы да барлық негізгі көрсеткіштер бойынша өсімді көрсетіп отыр. Соңғы бес жылда жалпы сақтандыру бойынша сақтандыру компанияларының активтері 56%-ға артып, 2024 жылғы 1 қарашадағы жағдай бойынша 1,4 трлн теңгені құрады. Ал сақтандыру төлемдері 70%-ға өсіп, 102 миллиардтан 176 миллиард теңгеге жеткен.

Агенттік өкілдерінің айтуынша, сақтандыру төлемдері бойынша көшбасшылар – міндетті сақтандыру, мүлікті ерікті сақтандыру және ауру жағдайларына ерікті сақтандыру қызметтері.