Қазақстанда отандық әуе компанияларының бортында алғаш рет интернет пайда болады

Цифрлық даму, инновациялар және аэроғарыш өнеркәсібі министрі Жаслан Мәдиев еліміздің байланыс инфрақұрылымын дамыту барысы туралы маңызды жаңалықтармен бөлісті. Министрдің айтуынша, биылғы жылы отандық әуе тасымалдаушыларының ұшақтарында интернет желісін іске қосу жоспарланған. Бұл бастама инфрақұрылымды жаңғыртуға бағытталған ауқымды жобаның бір бөлігі болып табылады және негізгі жұмыстарды осы жылдың соңына дейін аяқтау көзделіп отыр.

Байланыс саласындағы оң өзгерістер тек әуе қатынасымен шектелмейді. Министрлік мәліметінше, биыл тағы 1900 ауылға интернет тартылса, келесі жылы елді мекендердің 90%-дан астамы талшықты-оптикалық байланыс желісіне қосылмақ. Сонымен қатар жоғары жылдамдықты интернет барлық республикалық трассалар мен шекарадағы өткізу пункттерінде, сондай-ақ жолаушылар пойыздарының негізгі бағыттарында қолжетімді болады.