Қазақстанда «Омикрон» штамының жаңа нұсқалары таралуда: Санитарлық қызметтің ресми мәлімдемесі

Қазақстан Республикасы Денсаулық сақтау министрлігі Санитарлық-эпидемиологиялық бақылау комитеті (СЭБК) ел аумағындағы коронавирус инфекциясына (КВИ) қатысты ағымдағы жағдай туралы ресми мәлімет жариялады.

Мониторинг нәтижелеріне сәйкес, елде «Омикрон» штамының бірнеше кіші түрі циркуляциялануда.

2026 жылдың басынан бері республика бойынша КВИ-дің 5 жағдайы тіркелді. Мамандардың айтуынша, бұл көрсеткіш өткен жылдың сәйкес кезеңімен салыстырғанда 17,2 есеге төмен. Қуаныштысы, биыл аурудан болатын өлім-жітім жағдайлары тіркелген жоқ.

Мамандар SARS-CoV-2 вирусының өзгеруін бақылау мақсатында жүйелі түрде мониторинг жүргізуде. Бүгінгі таңда анықталған подварианттардың арасалмағы төмендегідей:

• XFG.3 – 75%: Елдегі ең көп таралған басым нұсқа;

• XFG.3.1 – 12,5%: Генетикалық жақын подвариант;

• XFG.6 – 12,5%: Омикрон желісінің кезекті мутациясы.

Санитарлық-эпидемиологиялық бақылау комитетінің өкілдері XFG желісінің таралуы халық денсаулығы үшін қосымша қауіп тудырмайтынын баса айтты.

«XFG желісінің циркуляциясы "Омикронның" бұған дейін тараған басқа нұсқаларымен салыстырғанда аурудың ауырлығы немесе таралу жылдамдығы бойынша айтарлықтай ерекшеленбейді», - делінген ресми хабарламада.

Мамандар жағдайдың толық бақылауда екенін және тұрақты бақылау жұмыстары жалғасып жатқанын ескертеді.