Қазақстанда мүгедектікті белгілеу үшін тәуелсіз дәрігерлер тартыла бастады

Қазақстанда мүгедектікті белгілеу үшін медициналық-әлеуметтік сараптамаға тәуелсіз сарапшыларды тарту бойынша пилоттық жоба басталды. Ал тәуелсіз сарапшылар институтын толыққанды енгізу 2025 жылдың 1 қаңтарынан бастап Әлеуметтік кодекспен көзделген, деп хабарлады еңбек және халықты әлеуметтік қорғау министрлігінің баспасөз қызметі.

Министрліктің түсіндіруінше, тәуелсіз сарапшы болуға үміткерлер тестілеуден өтіп, жоғары медициналық білімі, денсаулық сақтау саласының маманы сертификаты және медициналық-әлеуметтік сараптама жүргізу мәселелері бойынша соңғы бес жыл ішінде оқудан өткенін растайтын құжаты болуы қажет.

«Осылайша, тәуелсіз сарапшыларды іріктеу конкурстық негізде, олардың біліктілік деңгейі мен еңбек өтілін ескере отырып жүргізіледі», - деп атап өтті ведомствода.

Министрлік мәліметінше, байқауға 50-ге жуық адам қатысып, іріктеу кезеңдерінен 18 дәрігер өтті. Оларға медициналық құжаттар электронды түрде, пациенттердің аты-жөнінсіз, мемлекеттік органдар мен денсаулық сақтау министрлігінің ақпараттық жүйелері арқылы беріледі. Мысалы, Алматыда тұратын сарапшыға тек басқа өңірлерден құжаттар түседі.

«Тәуелсіз сарапшылар институтын енгізу азаматтардың сарапшылармен тікелей байланысын және тиісінше сыбайлас жемқорлық элементтерін болдырмауға бағытталған», - деп атап өтті Еңбек және халықты әлеуметтік қорғау министрлігінде.

Медициналық-әлеуметтік сараптамадан кейін мүгедектік тобы белгіленсе, тағайындалған әлеуметтік төлемдер мен арнайы әлеуметтік қызметтер арыз берушінің қатысуынсыз проактивті түрде жүргізіледі.

Медициналық-әлеуметтік сараптама 2022 жылдың 1 қаңтарынан бастап сырттай форматта өткізіліп келеді және қазіргі уақытта 30 нозологиялық форма бойынша жүзеге асырылуда.