Қазақстанда Конституциялық комиссия құрылды: құрамына кімдер кірді

Қазақстан Президенті Қасым-Жомарт Тоқаев Конституциялық реформа жөніндегі комиссия құру туралы жарлыққа қол қойды. Жаңа комиссия Мемлекет басшысының жанынан құрылып, ел Конституциясын кешенді жаңғыртуға қатысты ұсыныстар әзірлеумен айналысады.

Комиссия төрайымы болып Конституциялық соттың төрағасы Эльвира Әзімова тағайындалды. Төрайымның орынбасарлары ретінде мемлекеттік кеңесші Ерлан Қарин және Премьер-министрдің орынбасары – Мәдениет және ақпарат министрі Аида Балаева бекітілді. Ал комиссияның хатшысы қызметін Президент Әкімшілігінің мемлекеттік-құқықтық бөлімінің меңгерушісі Айдар Жарылғанов атқарады.

Комиссия құрамына 100-ден астам адам енген. Олардың қатарында Парламент Мәжілісі мен Сенатының депутаттары, өңірлік мәслихаттардың төрағалары, әкімдер, Конституциялық сот судьялары, Президент Әкімшілігі мен Үкімет өкілдері бар.

Сонымен бірге комиссия жұмысына белгілі заңгерлер, саясаттанушылар, ғалымдар, бұқаралық ақпарат құралдарының басшылары мен журналистер, қоғамдық кеңестер мен азаматтық сектор өкілдері тартылған.

Конституциялық комиссия кеңесші-талдамалық орган мәртебесіне ие. Оның басты міндеті – Конституциялық реформаға қатысты ұсыныстарды жинақтап, талдау жүргізу және Мемлекет басшысына ұсынымдар әзірлеу. Комиссияның жұмыс органы ретінде Конституциялық соттың аппараты айқындалды.