Қазақстанда кімдер 2-3 миллион теңге жалақы ала алады: Еңбек министрлігінің мәліметі

Қазақстанның еңбек нарығында жоғары жалақы ұсынылатын мамандықтар белгілі болды. Enbek.kz электрондық еңбек биржасының ақпан айындағы қорытындысы бойынша, жұмыс берушілер кейбір техникалық және инженерлік позициялар үшін айына 2 миллион теңгеден астам ақы төлеуге дайын.

Еңбек министрлігі баспасөз қызметінің хабарлауынша, нарықтағы сұраныс негізінен әлеуметтік сала, қызмет көрсету және жұмысшы мамандықтарына шоғырланған. Ақпан айында жұмыс берушілер тарапынан 99 мың бос жұмыс орны жарияланса, 124,9 мың түйіндеме тіркелген. Бос жұмыс орындарының басым бөлігі Павлодар облысы, Астана қаласы және Түркістан облысында байқалады.

Ең жоғары жалақы ұсынылатын мамандықтар:

Биылғы жылдың басында жұмыс берушілер келесі мамандарға ең қомақты еңбекақы ұсынуда:

• Мұнай және газ кен орындарын игеру инженер-зерттеушісі – шамамен 3,6 млн теңге;

• Құрылыстағы жобаның бас технологы – 2,8 млн теңге;

• Материалтану техниктері – 2,2 млн теңге.

Ал үміткерлер тарапынан ең жоғары жалақы талап ететіндер қатарында ұшқыштар (3,3 млн теңге), инвестициялық жобалар жөніндегі директорлар (2,1 млн теңге) және курстарды әзірлеуші мамандар (2 млн теңге) бар. Министрлік өкілдері еңбек нарығында жастар мен еліміздің оңтүстік өңірлерінен шыққан ізденушілердің белсенділігі жоғары екенін атап өтті.