Қазақстанда кейбір мемлекеттік қызметші міндетті түрде нашақорлыққа тексерілетін болады

Қазақстанда бірқатар мемлекеттік қызметкерлерді есірткі және психотроптық заттарды қолдану фактісіне тексеру міндетті болады. Бұл нормалар «Мемлекеттік қызмет туралы» заң жобасында көзделген.

Мәжіліс аталған заң жобасын және оған ілеспе құжатты пленарлық отырыста екінші оқылымда қабылдады.

Құжатқа сәйкес, мемлекеттік қызметшілерді медициналық тексеруден өткізу талаптары енгізіледі. Бұл шара заңсыз есірткі және психотроптық заттарды қолданудың алдын алу және анықтау мақсатында қолға алынбақ.

Ілеспе заң жобасында мұндай тексеруді өткізу тәртібі мен негіздері, сондай-ақ тексерілуге жататын лауазымдар тізімі айқындалады.

Сонымен қатар тексерілуі тиіс қызметтер тізімі ашық жарияланбайды. Ол мемлекеттік орган басшысы немесе аппарат жетекшісі бекітетін, «қызметтік пайдалану үшін» деген белгісі бар құжаттар қатарына жатқызылады.

Құжат қабылданғаннан кейін тиісті рәсімдер заңнама талаптарына сәйкес жүзеге асырылады.