Қазақстанда ескі телефондарға сұраныс күрт артты: мамандар маңызды ескерту жасады

Қазақстанда пайдаланылған және істен шыққан ұялы телефондарды сатып алуға қызығушылық артып келеді. Қазіргі уақытта сатып алушылар жұмыс істемейтін құрылғыларды да қабылдауда, деп хабарлайды 31 арна.

Соңғы уақытта еліміздің бірқатар қалаларында дауыс зорайтқыш орнатылған көліктер тұрғындарды ескі әрі бұзылған телефондарын сатуға шақырып жүр. Сонымен қатар жөндеу шеберханаларында да ескі құрылғыларды сатып алу жөніндегі хабарландырулар көбейген. Сатып алушылардың айтуынша, оларды негізінен құрылғылардың аналық тақталары мен жады модульдері қызықтырады.

Техника жөндеу саласында 13 жылдан астам еңбек етіп келе жатқан маман Жақсылық Мұсатаевтың айтуынша, қолданыста болған құрылғылар нарығы екі бағытқа бөлінеді. Бір топ ескі телефондарды құрамындағы бағалы металдарды, соның ішінде алтын бөлшектерін алу үшін жинаса, екінші топ жұмысқа жарамды микросхемалар мен аналық тақталарды сатып алады. Себебі қазіргі уақытта көптеген телефон модельдеріне қажетті қосалқы бөлшектерді табу қиын әрі қымбатқа түседі.

Маманның сөзінше, жиналған бөлшектер кейін жөндеу жұмыстарына пайдаланылады немесе қайта құрастырылған құрылғыларды нарыққа шығаруға жұмсалады. Мұндай телефондардың бағасы олардың күйіне қарай 500 теңгеден 10 мың теңгеге дейін жетеді.

Сонымен қатар сарапшылар ескі телефондарды сату кезінде жеке деректердің қауіпсіздігіне ерекше назар аударуға шақырады. Киберқауіпсіздік саласының маманы Евгений Питолин смартфонда сақталған ақпараттың қаржы қызметтеріне, құжаттарға және жеке мәліметтерге қолжетімділік беретінін атап өтті.

Оның айтуынша, көптеген азаматтар құрылғыны зауыттық параметрлерге қайтару барлық ақпаратты толық жояды деп есептейді. Алайда іс жүзінде деректер жадтан бірден өшірілмейді және арнайы бағдарламалар арқылы қалпына келтірілуі мүмкін.

Мамандар телефонды сатпас бұрын келесі қауіпсіздік шараларын орындауға кеңес береді:

• барлық аккаунттардан шығып, сақталған құпиясөздерді жою;
• маңызды құжаттар мен файлдардың резервтік көшірмесін жасау;
• жеке кабинет арқылы құрылғыны тіркелген құрылғылар тізімінен алып тастау;
• «Құрылғыны табу» функциясын өшіру;
• құрылғыны зауыттық параметрлерге қайтару.

Сарапшылардың пікірінше, бұл әрекеттер жеке деректердің бөгде адамдардың қолына түсу қаупін азайтады.