Қазақстанда енді жол апатына ұшыраған көлік иелеріне айыппұл салынуы мүмкін

Бүгіннен бастап елімізде жол қозғалысы ережелеріне қатысты маңызды заңнамалық түзетулер қолданысқа енді. Бұл өзгерістер тас жолдардағы жылдамдықты бақылау тәртібі мен апаттан кейінгі техникалық тексеру рәсімдерін түбегейлі өзгертеді.

Енді камераның алдында жылдамдықты азайта салу көмектеспейді. Жүйе автокөліктің екі бақылау нүктесі арасындағы қашықтықты қанша уақытта өткенін автоматты түрде есептейді. Егер көлік белгіленген уақыттан ерте жетсе, бұл жылдамдықты асыру деп танылып, айыппұл салынады. Бұл әдіс әсіресе қала сыртындағы магистральдар мен ақылы жолдарда қатаң бақыланады. Айыппұл көлемі бұзушылық деңгейіне қарай 5-тен 40 АЕК-ке дейін барады.

Тағы бір маңызды жаңалық - жол жиегіндегі камералардың алдында «Фотобейнетіркеу» белгісін қою міндеті алынып тасталды. Енді жүргізушілер тек жылдамдықты шектейтін негізгі белгілерге сүйенуі тиіс. Ереже бұзды деп тоқтатылған жүргізуші полиция қызметкерінен бейнежазбаны сол жерде көрсетуді талап етуге құқылы.

Автокөлік құралы ауыр жол-көлік оқиғасына ұшырап, оның конструкциясы мен маңызды бөлшектеріне критикалық зақым келген жағдайда, аталған көліктің диагностикалық картасы (техникалық байқау құжаты) бірыңғай ақпараттық жүйеде автоматты түрде жойылады.Техникалық байқаудан қайта өтпегені үшін әкімшілік айыппұл салынады

Арнайы қызмет көліктеріне (жедел жәрдем, өрт сөндіру) жол беру талабы жаяу жүргіншілер үшін де күшейтілді. Сирена немесе маяктары қосулы көлік жақындағанда, жаяу жүргіншілер жолға шықпауы керек, ал жолда жүргендері дереу жолды босатуға міндетті.