Қазақстанда екі баласы бар бір отбасына екі бөлмелі, ал екіншісіне үш бөлмелі пәтер берілуі мүмкін. Бұл неге байланысты?

Қазақстанда мемлекеттік тұрғын үйді бөлу ережелеріне маңызды өзгерістер енгізіледі. Тұрғын үй қатынастары басқармасының мәліметінше, жаңа тәртіп 14 қыркүйектен бастап күшіне енеді. Енді баспана кезегінде тұрған азаматтарға пәтер үлестіру кезінде тек жалпы аумақ (әр адамға 15–18 шаршы метр) ғана емес, сонымен бірге отбасының құрамы мен балалардың жынысы да ескерілетін болады, деп хабарлайды 31 арна.

Өнеркәсіп және құрылыс министрлігі Жұмыспен қамту және тұрғын үй қатынастары басқармасының басшысы Әсем Әлжанованың түсіндіруінше, жаңа ереже бойынша отбасындағы екі бала бір жынысты (екі ұл немесе екі қыз) болса, оларға екі бөлмелі пәтер беріледі. Ал егер балалар әртүрлі жынысты болса, әр баланың жеке бөлмесі болуы үшін үш бөлмелі баспана қарастырылады.

Егер кезегі келген отбасыға сәйкес келетін бөлме саны бар пәтер табылмаса, оларға бөлме саны азырақ баспана ұсынылуы мүмкін. Азаматтар бұл ұсыныстан бас тартқан жағдайда, өздерінің кезегін сақтай отырып, қолайлы нұсқаны күтуді жалғастыра алады.

Психолог мамандардың пікірінше, баланың жеке кеңістігінің болуы оның тұлға болып қалыптасуына, өзіндік шекараларын сезінуіне және қауіпсіздік пен жауапкершілікті үйренуіне оң әсер етеді. Шенеуніктер мен "Отбасы банк" өкілдері бұл қадам мемлекеттік баспананы әлеуметтік тұрғыдан әділетті әрі мекенжайлық үлестіруге мүмкіндік береді деп есептейді.