Қазақстанда декларация тапсыру мерзімі аяқталып жатыр: тапсырмағандарға қандай жаза қарастырылған?

Бүгін, 15 қыркүйекте, Қазақстанда 2024 жылға арналған табыс пен мүлік туралы электронды декларация тапсырудың соңғы күні.

Декларацияны салық төлеушінің жеке кабинеті арқылы Мемлекеттік кірістер комитетінің порталында, eGov порталында, eSalyq Azamat қосымшасы мен жобаға қатысушы екінші деңгейлі банктердің мобильді қызметтері арқылы тапсыруға болады.

📌 Жауапкершілік:

• Декларацияны уақытында тапсырмағандарға алғаш рет ескерту беріледі. Қайталанған жағдайда айыппұл салынады – 15 АЕК (58 980 теңге).

• Салық салынатын объектілерді жасырғаны үшін айыппұл:

  • бірінші рет – жасырылған салық сомасының 200% мөлшерінде;

  • қайталап жасалған жағдайда – 300% мөлшерінде.

• Шетелдегі мүлік пен банктегі ақшаны жасырып қалған жеке тұлғаларға 100 АЕК (393 200 теңге) айыппұл қарастырылған.

📌 Кімдер декларация тапсыруға міндетті?

• мемлекеттік қызметшілер;

• ұлттық компаниялардың басшылары мен қатысушылары, сондай-ақ олардың жұбайлары;

• банктер мен қаржы ұйымдарының ірі қатысушылары;

• нотариустар, адвокаттар, сот орындаушылары, медиаторлар;

• жалға беруден немесе цифрлық активтермен операциялардан табыс тапқандар;

• шетелдік банктерде 1000 АЕК-тен (3,9 млн теңге) астам қаражаты барлар;

• шетелде активке иелік ететіндер (жылжымайтын мүлік, көлік, құнды қағаздар, цифрлық активтер, инвестициялық алтын);

• 2024 жылы Қазақстанда немесе шетелде құны 200 мың АЕК-тен (78,6 млн теңге) асатын мүлік сатып алғандар.