Қазақстанда дәрігерлерді ұрып-соғу жиілеп кетті: Денсаулық сақтау министрі халыққа үндеу жасады

Қазақстанның Денсаулық сақтау министрі Ақмарал Әлназарова соңғы кездері медицина қызметкерлерін ұрып-соғу көбейгеніне байланысты халыққа ашық үндеу жолдады.

Министр бұл мәселені тек қызметтік тұрғыдан емес, бұрын акушер болып, бала туған аналарға, дәрігер болып, науқас балаларға көмектескен маман ретінде көтеріп отырғанын айтты.

"Медицина қызметкерлеріне жасалатын зорлық-зомбылықты тоқтатыңыздар! Күн сайын адам өмірін сақтап қалуға тырысатын жанға қол көтеру – қандай қатыгездік пен ашу-ыза деңгейінің белгісі? Бейбіт заманда дәрігерлер өз жұмыс орнында өміріне қауіп төнген күйде еңбек етуге мәжбүр. Бұл – ақылға қонбайтын, мүлдем қабылдауға болмайтын жағдай", – деп жазды министр әлеуметтік желідегі парақшасында.

Ақмарал Әлназарованың айтуынша, мұндай оқиғалардың салдарынан ондаған науқас ем қабылдай алмай қалады, шұғыл оталар кейінге шегеріледі. Бұл – тұтас медициналық жүйеге соққы деді министр.

Министрдің мәлімдеуінше, қыркүйек айында Парламентке медицина қызметкерлерін ұрып-соққандарға жауапкершілікті қатаңдататаын заңнамалық өзгерістер енгізіледі.

"Мұндай әрекеттер жай ғана тұрмыстық жанжал ретінде емес, қоғамдық қауіпсіздікке төнген нақты қатер ретінде қарастырылуы тиіс. Ішкі істер министрімен бірге шұғыл түрде жансақтау бөлімдері, перзентханалар мен балалар стационарларына тәулік бойы кезекшілік қойып, барлық медициналық мекемелерді бейнебақылау, дабыл түймесі мен күзетпен қамтамасыз ету туралы шешім қабылдадық", – деді Әлназарова.

Күні кеше ғана екі ауыр жағдай тіркелді:

▪️ 16 шілдеде Қарағандыда ер адам жекеменшік медициналық орталықтың мейірбикесіне қол көтерген. Зардап шеккен әйел нейрохирургия бөлімінде ем қабылдап жатыр. Күдікті – 42 жастағы ер адам психоневрологиялық орталыққа жеткізілген.

▪️ 17 шілдеде Қостанай облыстық ауруханасында науқас дәрігерді ұрып-соққан, дәрігер реанимацияға түскен. Жағдайы – ауыр. 34 жастағы күдікті ұсталды.