Қазақстанда Connect-Ed зейнеткерлер мен балаларға арналған қазақ тіліндегі цифрлық сауаттылық жобасын бастады

Қазақстанда ауыл мен қала, жас пен үлкен арасында технологияны меңгеру деңгейінде айтарлықтай алшақтық бар. Әсіресе қазақ тіліндегі сапалы цифрлық контент аз, алайда оған сұраныс өте жоғары. Осал топтардың қатарында зейнеткерлер мен балалар тұр. Олар интернеттегі қауіп-қатерлерден жиі зардап шегеді.

Ішкі істер министрлігінің дерегінше, 2025 жылдың басынан бері интернет арқылы жасалатын алаяқтық былтырғы жылмен салыстырғанда 9% артқан. Алаяқтар 25 млрд теңге жымқырып үлгерген. Жалған қоңыраулар, фишинг, жалған сайттар – олардың басты тәсілдері.

Осы жағдайға жауап ретінде Connect-Ed қоғамдық қоры қазақ тілінде қысқа әрі түсінікті бейнероликтер әзірлеуді қолға алды. Жоба зейнеткерлер мен балаларға базалық цифрлық дағдыларды үйретіп, интернеттегі қауіпсіздікті күшейтуді мақсат етеді.

60 бейнеролик түсіріледі

Жоба аясында 60 видео жарияланады. Онда интернеттегі қауіпсіздік, медиа сауаттылық, цифрлық этика, жалған ақпаратты анықтау, әлеуметтік желілерді қауіпсіз пайдалану және онлайн кеңістікте өзін қорғау тәсілдері қамтылады.
Қазірдің өзінде Instagram парақшасында алғашқы 5 видео жарық көрген. Онда жаңа смартфонды пайдалану, әлеуметтік желіде аккаунт ашу, аудио хабарлама жазу сынды тақырыптар бар.

Қаржылай қолдау және серіктестік қажет

Жоба көпшіліктің краудфандинг арқылы берген қаржысына жүзеге асып жатыр. Бүгінге дейін шамамен 350 мың теңге жиналған, бұл қаражат түсірілім мен монтажға, сондай-ақ әлеуметтік желілерде таратуға жұмсалды. Толық іске асуы үшін 1,5 млн теңге қажет.

Ұйым жоба контентін кеңінен тарату үшін медиа серіктестерді, қаржылай демеушілерді және еріктілерді іздейді.

2020 жылдан бергі жетістіктер

Connect-Ed 2020 жылдан бері 585 дана техника таратып, екі мыңнан астам баланы технологиямен қамтамасыз еткен. Сонымен қатар 320 бала мен ересек адам арнайы курстан өтіп, базалық цифрлық білім алған. Курсты аяқтағандардың 31 пайызы ауыл тұрғындары, ал орташа жасы – 11 жас. Барлық оқыту мен қолдау жұмыстары еріктілердің тегін еңбегімен жүзеге асады.

Неге бұл маңызды?

Қазір мемлекеттік қызметтер eGov-та, төлемдердің басым бөлігі Kaspi арқылы жасалады. Техника мен интернетке қол жеткізе алатын әрбір азамат оны қауіпсіз әрі тиімді қолдануды білуі тиіс. Әсіресе шалғай ауылдардағы балалар мен зейнеткерлер үшін бұл – тең мүмкіндік пен қауіпсіздіктің кепілі.