Қазақстанда бірыңғай QR-код қашан енгізіледі? Ұлттық банк төрағасы нақты мерзімін айтты

Қазақстандағы банктер арасындағы бірыңғай QR-код жүйесінің енгізілу мерзімі мен дайындық барысы туралы Ұлттық банк төрағасы Тимур Сүлейменов брифинг кезінде айтып берді. Қазіргі уақытта қаржы ұйымдары техникалық мәселелерді, соның ішінде деректер қауіпсіздігін қамтамасыз ету жұмыстарын пысықтап жатыр.

Жүйені енгізуді көздейтін заң нормалары мен қаулылар ағымдағы жылдың 19 шілдесіндекүшіне енеді. Осы күнге дейін еліміздегі барлық банктер жүйеге қатысушы ретінде қосылуға міндетті. Қазіргі таңда банктер қосылу туралы келісімшартқа қол қойып, техникалық жұмыстарды жүргізуде.

Тимур Сүлейменовтың айтуынша, басты назар төлемдердің қауіпсіздігіне аударылып отыр.

«Бұл — криптография мен цифрлық жүйе, оны жете түсіну керек. Төлем жасаушының дербес деректері мен басқа да маңызды ақпараттардың қорғалуын толық қамтамасыз етуіміз қажет. Әйтпесе, серпінді жобаның орнына үлкен проблемаларға тап болуымыз мүмкін. Сондықтан біз бұл процесті асықтырғымыз келмейді, банктердің техникалық қызметтері барлығын дұрыс реттеуі тиіс», – деді Ұлттық банк басшысы.

Ол сонымен қатар бірыңғай QR-код 19 шілдеден ерте де пайда болуы мүмкін екенін, бірақ белгіленген мерзімге дейін жүйені енгізбеген банктерге жауапкершілік жүктелетінін ескертті.

Бұған дейін Қазақстан қаржыгерлер қауымдастығы бұл процесс кестеден озып келе жатқанын айтса, Мемлекет басшысы ірі қаржы ұйымдарының жүйеге қосылуға асықпай отырғанын сынға алған болатын. Ұлттық банк төрағасы бұл іркілістерді банктердегі технологиялық протоколдардың әртүрлілігімен байланыстырды.