Қазақстанда бірыңғай QR арқылы 56 миллиард теңгеге төлем жасалды

Қазақстанда жаңа Банкаралық мобильді төлемдер жүйесі іске қосылған сәттен бастап 28 шілдедегі жағдай бойынша 56,6 миллиард теңгеге 2 миллионнан астам транзакция жүргізілді. Ұлттық банк өкілдерінің хабарлауынша, жүйе басталғалы бері ешқандай техникалық ақау тіркелмеген және пайдаланушылар тарапынан шағым түспеген. Төлем инфрақұрылымының үздіксіз жұмысы мен қолжетімділігін Ұлттық төлем корпорациясы тұрақты түрде бақылауда ұстап отыр.

Сегменттегі бәсекелестікті қолдау және бизнеске артық салмақ түсірмеу мақсатында реттеуші орган комиссия мөлшерін шектеді. Ережеге сәйкес, әртүрлі банктер арасындағы бірыңғай QR арқылы төлем комиссиясы әдеттегі төлем карталарының тарифінен аспауы тиіс. Егер төлем әртүрлі банктер арасында жүрсе, комиссияның 1 пайыздық үлесі тұтынушы банкіне (кэшбэк пен бонустарды қаржыландыру үшін) өтеді, ал қалған бөлігі кәсіпкерге қызмет көрсететін банкте қалады.

Ұлттық банк бірыңғай QR жүйесінің бизнес үшін міндетті емес, қосымша әрі ыңғайлы құрал екенін атап өтті. Кәсіпкерлер бірнеше банктің төлем терминалын қатар пайдалануды жалғастыра алады немесе барлық төлем түрлерін бір терминалға біріктіруді өз қалауынша таңдайды. Сонымен қатар, таяу арада осы жүйе негізінде сұраныс бойынша төлем жасау және компаниялар арасындағы өзара есеп айырысу сияқты жаңа мүмкіндіктер енгізіледі.