Қазақстанда бірқатар дәрілерді қолдануға тыйым салынды

ҚР Денсаулық сақтау министрлігі Медициналық және фармацевтикалық бақылау комитетінің төрағасы елімізде кейбір дәрілік заттарды пайдалануға тыйым салу және оларды сауда айналымынан шығару туралы бұйрыққа қол қойды. Тиісті құжат 2026 жылғы 23 ақпанда күшіне енді.

Ресми бұйрыққа сәйкес, отандық «Химфарм» АҚ өндірген келесі дәрілік затты медициналық қолдануға шектеу қойылды:

Препарат: Стрептоцид (таблеткалар, 300 мг).
Қаптамасы: 10 таблеткадан тұратын 5 контурлы ұяшық.
Жарамдылық мерзімі: 08.2030 жылға дейін.
Тіркеу нөмірі: РК-ЛС-5№003366.

Бұл шешімге Дәрілік заттар мен медициналық бұйымдарды сараптау ұлттық орталығының сараптамалық қорытындысы мен 2026 жылғы 13 ақпандағы арнайы сынақ хаттамасы негіз болған. Комитет бұл жағдай туралы барлық аумақтық бөлімшелерді, «Әлеуметтік медициналық сақтандыру қоры» мен «СК-Фармация» ЖШС-ін жедел құлақтандыруды тапсырды.

Тіркеу куәліктері кері қайтарылған препараттар
Сонымен қатар бұйрық аясында шетелдік өндірушілердің бірқатар дәрілік заттарының тіркеу куәліктері күшін жойды:

• Левомицетин (Хлорамфеникол) – инъекцияға арналған ұнтақ (1 г), өндіруші: «Киевмедпрепарат» ПАҚ, Украина.
• ГЛИТЕЙК (Тейкопланин) – инъекцияға арналған лиофилизат (400 мг), өндіруші: «Киевмедпрепарат» ПАҚ, Украина.
• Нименрикс® – менингококк инфекциясына қарсы вакцина, өндіруші: «Пфайзер Инк», АҚШ.
• Грасулан – капсулалар (0,4 мг), өндіруші: «Гранд Медикал Групп АГ», Швейцария.
• Лайленон – таблеткалар (25 мг және 50 мг), өндіруші: «Гранд Медикал Групп АГ», Швейцария.

Маңызды: Бұйрыққа қол қойылған сәттен бастап аталған дәрі-дәрмектерді сатуға және медициналық мекемелерде қолдануға жол берілмейді. Мамандар азаматтарға үй дәрі қобдишасындағы препараттардың сериясы мен өндірушісіне назар аударуды ескертеді.