Қазақстанда банктердің активтері 75,6 трлн теңгеге жетті

Президент Қасым-Жомарт Тоқаев Қаржы нарығын реттеу және дамыту агенттігінің төрағасы Мәдина Әбілқасымованы қабылдады. Кездесуде қаржы нарығын реттеу мен дамытудың биылғы 8 айдағы нәтижелері және алдағы міндеттер талқыланды.

Мәдина Әбілқасымованың айтуынша, банктер туралы жаңа заңды іске асыру аясында заңға тәуелді актілер толық жаңартылып, 80 нормативтік-құқықтық акт қабылданған. Банктердің активтері 6,9 пайыз өсіп, 75,6 трлн теңгеге жеткен. Капиталдың жеткіліктілік деңгейі 20,7 пайызды құрады.

Агенттік 8 айда қаржы секторы субъектілеріне 279 инспекторлық тексеру жүргізген. Нәтижесінде 190 қадағалау шарасы қолданылып, жалпы сомасы 465 млн теңге айыппұл салынған.

Микроқаржыландыру және коллекторлық агенттіктер нарығында жұмыс істейтін 13 субъект лицензиясынан айырылған. Тағы 6 субъектінің лицензиясы уақытша тоқтатылып, 4 коллекторлық агенттік тізілімнен шығарылған.

Сонымен қатар халықтың шамадан тыс несие алуын азайту және экономиканы қаржыландыруды кеңейту шаралары қаралған. Бизнеске берілген кредит көлемі 3,5 пайыз өсіп, 16 трлн теңгеге жеткен. Ал жыл басынан бері кәсіпкерлікке жаңадан берілген кредит көлемі 19,1 пайызға артып, 12,5 трлн теңгені құрады.

Реттеу шараларының нәтижесінде 7 айда тұтынушылық несиенің өсімі 4,6 пайызға дейін баяулаған. Биыл шілдеден бастап мерзімі өткен берешекті ұжымдық реттеуге арналған Finkelisimkz платформасы іске қосылды. Жыл соңына дейін азаматтардың арыз-шағымдарын қарайтын Бірыңғай қаржы омбудсмені кеңсесі жұмысын бастайды.

Кездесуде Капитал нарығы мен сақтандыру нарығын дамытудың 2030 жылға дейінгі бағдарламасы, сондай-ақ «Капитал нарығы туралы» және «Сақтандыру нарығы туралы» жаңа заң жобаларын әзірлеу барысы да талқыланды.

Мәдина Әбілқасымова агенттік жасанды интеллект технологиясына негізделген FinAI бірыңғай қадағалау платформасын құрғанын айтты. Жыл соңына дейін Қаржы нарығына жасанды интеллектіні енгізу стратегиясы әзірленбек. Онда ақпараттық қауіпсіздік пен деректерді қорғаудың бірыңғай тәсілдері қарастырылады.

Кездесу қорытындысында Президент қаржылық тұрақтылықты қамтамасыз ету, қаржы саласында жасанды интеллектіні кеңінен пайдалану, экономиканың нақты секторларын кредиттеуді арттыру, сондай-ақ капитал мен сақтандыру нарығын одан әрі дамыту жөнінде бірқатар тапсырма берді.