Қазақстанда барлық банкке ортақ бірыңғай QR-төлем жүйесі іске қосылады

Қазақстан Республикасы Ұлттық банкінің төрағасы Тимур Сүлейменов 19 шілдеден бастап елімізде банктер аралық бірыңғай QR-төлем жүйесі толыққанды жұмыс істейтінін мәлімдеді.

Бұл туралы Тимур Сүлейменов 18 маусым күні Сенаттың пленарлық отырысы барысында хабарлады. Жаңа жүйе азаматтар мен бизнес өкілдері үшін қолма-қол ақшасыз есеп айырысу мүмкіндіктерін кеңейтіп, оның қолжетімділігін арттыруға бағытталған.

Клиенттер QR-код арқылы бір банк шеңберінде ғана емес, әртүрлі қаржы ұйымдары арасында да төлемдер мен аударымдар жасай алады. 19 шілдеден бастап күшіне енетін заң нормаларына сәйкес, барлық қазақстандық банктердің аталған жүйеге қосылуы міндетті болады.

Сәуір айында еліміздің барлық банктері банктер аралық бірыңғай QR-жүйесіне қосылғаны белгілі болды, ал маусым айында барлық техникалық жұмыстар аяқталды.

Айта кету керек, банктер аралық бірыңғай QR-төлем жүйесі 2025 жылдың қарашасында іске қосылған болатын. Қазіргі таңда Ұлттық банк банктер аралық мобильді төлемдер жүйесі базасында төлем операцияларын өткізуді қамтамасыз етеді. Сондай-ақ, реттеуші орталықтың қолдауымен цифрлық қаржылық активтер саласында 30-дан астам инновациялық жоба іске асырылуда.