Қазақстанда балаларға арналған фастфуд жарнамасына шектеу қойылмақ

Қазақстанда балаларға бағытталған фастфуд, тәтті сусындар және құрамында қант, тұз бен қаныққан май мөлшері жоғары басқа да тағамдардың жарнамасын шектеу жоспарланып отыр. Денсаулық сақтау министрлігі тиісті заңнамалық өзгерістерді әзірлеп жатыр.

Министрлік мұндай жарнаманың балалар мен жасөспірімдердің тамақтану әдетіне әсер ететінін алға тартады. Жарқын қаптама, әлеуметтік желілер, блогерлер және өзге де жарнама тәсілдері арқылы балалардың мұндай өнімдерге қызығушылығы артуы мүмкін. Шектеу теледидар, радио, сыртқы жарнама мен әлеуметтік желілерді қамтуы ықтимал.

Бұл ретте фастфуд пен аталған өнімдерді сатуға тыйым салу көзделіп отырған жоқ. Ұсыныстың мақсаты – балаларға бағытталған жарнаманың ықпалын азайту.

Министрлік дерегінше, Қазақстанда 6-9 жас аралығындағы әрбір төртінші балаға жуығында артық салмақ бар, ал балалардың 6 пайызына семіздік диагнозы қойылған. Сонымен қатар жасөспірімдердің 17,5 пайызы энергетикалық сусынды аптасына кемінде бір рет ішеді.

Бұған дейін, 26 тамызда өткен педагогтердің тамыз конференциясында Президент Қасым-Жомарт Тоқаев фастфудтың «агрессивті жарнамасына» назар аударған еді. Мемлекет басшысы мұндай жарнама зиянды әдеттерді қалыптастырып, денсаулық сақтау жүйесіне түсетін салмақты арттыратынын айтқан. Сондай-ақ дәрігерлердің бақылауында қант диабетімен ауыратын 7 мыңға жуық бала барын атап өткен.

Президент Үкіметке құрамында май, қант және тұз мөлшері жоғары өнімдердің жарнамасын шектеу мәселесін жан-жақты қарастыруды тапсырған.