Қазақстанда балалар спортын қаржыландыру екі есеге жуық артуы мүмкін

Қазақстанда жан басына шаққандағы нормативтік қаржыландыруды енгізу есебінен балалар мен жасөспірімдер спортын қаржыландыруды екі есеге жуық ұлғайту жоспарлануда. Бұл туралы Туризм және спорт министрлігінің баспасөз қызметі хабарлады.

 «Балалар мен жасөспірімдер спорт мектептерінде бір спортшыны ұстауға жылына орта есеппен 415 мың теңге бөлінеді. Қазіргі уақыттағы сметалық қаржыландыру кезінде бұл көрсеткіш орта есеппен 233 мың теңгені құрайды», — делінген хабарламада.

Ведомствоның түсіндіруінше, бұл шаралар Мемлекет басшысының тапсырмасын орындау мақсатында әзірленген заң жобасында қарастырылған. Құжат спорт мектептерін жан басына шаққандағы норматив бойынша қаржыландыруды және оларды аккредиттеуге қойылатын талаптарды бекітуді көздейді.

Бүгінгі таңда Туризм және спорт министрлігі сметалық қаржыландыру жүйесін қолданатын жалғыз мемлекеттік орган болып отыр. Жаңа принципке көшу саланың басқару тиімділігін арттырып, балалар спортын қамтамасыз ету деңгейін көтеруге бағытталған.

Жобаны іске асыру жергілікті бюджеттерден қосымша қаражатты талап етеді. Бұл шығыстар республикалық бюджет комиссиясының шешімімен қолдау тауып, қаржыландыру жергілікті бюджеттер есебінен жүзеге асырылады.

Жан басына шаққандағы нормативтік қаржыландыруды еліміздің барлық спорт мектептерінде 2026 жылғы 1 қаңтардан бастап енгізу жоспарланған.