Қазақстанда балалар саясатын 2030 жылға дейін жүйелі түрде жаңғырту басталды

ҚР Оқу-ағарту министрлігінің кеңейтілген алқа отырысында балалардың құқықтарын қорғау саласындағы мемлекеттік саясатты іске асыру мәселелері басты назарға алынды.

Мемлекет басшысының тапсырмасы бойынша алғаш рет 2026–2030 жылдарға арналған «Қазақстан балалары» тұжырымдамасы әзірленді. Бұл құжат балалық шаққа қатысты іс-шаралар мен бағдарламаларды бір жүйеге келтіріп, баланың құқықтарын қорғауда бірыңғай тәсіл қалыптастыруға бағытталған.

«Тұжырымдаманың негізгі мақсаты – әрбір бала үшін білім алу, денсаулығын сақтау, әлеуметтік қорғалуды қамтамасыз ету және отбасында тәрбиелену құқықтарын жүйелі түрде қамтамасыз ететін үйлестірілген механизм құру. Ол балалардың қауіпсіздігін күшейтуді, психологиялық және әлеуметтік қолдау жүйесін жетілдіруді, сондай-ақ ведомствоаралық үйлестіруді нығайтуды көздейді. Қазақстан – балалардың құқықтарын қорғауда мақсатты ұлттық стратегиясы бар санаулы мемлекеттердің бірі», – деді Жұлдыз Сүлейменова.

Қазіргі таңда елімізде 6 902 492 бала тұрады, бұл халықтың үштен бірін құрайды. Соңғы онжылдықта балалар саны шамамен 1,5 миллионға артты, бұл инфрақұрылым мен қолдау жүйесін одан әрі жетілдіруді қажет етеді.

Балалардың құқықтарын қорғауды күшейту мақсатында 10 заң қабылданды, олардың ішінде зорлық-зомбылыққа нөлдік төзімділік принципін енгізетін заңдар бар. 2025 жылы әкімшілік жауапкершілікті бекітетін қосымша түзетулер енгізілді. Қазір 237 мыңнан астам бала психологиялық-медициналық-педагогикалық қолдаумен қамтылған, оның ішінде 17 мың бала үйде білім алады. Білім беру ұйымдарында 3,8 мың педагог-ассистент және 10 мыңнан астам арнайы педагог жұмыс істейді.

Балалардың тамақтануы мен санитариялық қауіпсіздігі де назарда. Мектептегі тамақтанудың жаңа стандарты енгізіліп, өнім сапасы мен санитариялық талаптарға бақылау күшейтілді. Мектепке дейінгі білім беруде «Ақша балаға беріледі» қағидаты бойынша ваучерлік қаржыландыру енгізіліп, бұл қаражатты екі есеге қысқартуға және 21 млрд теңгеден астам үнемдеуге мүмкіндік берді. Қазір елімізде 11 900 балабақша жұмыс істейді, онда шамамен 1 миллион бала тәрбиеленуде, ал мектепке дейінгі сыныптарда 163 мыңнан астам бала білім алады.

«Қазақстан балалары» тұжырымдамасын іске асыру балалар саясатын жүйелі дамытуға және әрбір бала үшін тең мүмкіндіктер жасауға бағытталған.