Қазақстанда автокөлік бағасы төмендейді – министр

Қазақстанда отандық автокөлік өндірісін кеңейту есебінен көлік бағасы төмендейді. Бұл туралы Өнеркәсіп және құрылыс министрі Ерсайын Нағаспаев Үкіметтегі брифингте мәлімдеді.

Министрдің айтуынша, қазақстандық зауыттар жыл сайын шығарылатын маркалар санын көбейтеді. Жаңа брендтердің нарыққа шығуы бәсекені арттырып, бағаның төмендеуіне ықпал етеді.

– Біздің зауыттар маркалар қатарын жыл сайын кеңейтеді. Жаңа маркалар шыққан сайын баға міндетті түрде төмендейді. Мұны нақты айта аламын. Отандық автокөлік өндірісінің өсуі қытайлық көліктер бағасының да төмендеуіне әсер етеді, – деді Ерсайын Нағаспаев.

Министрлер кабинеті отырысында ол өткен жылы Қазақстанның автокөлік өнеркәсібі рекордтық өсім көрсеткенін айтты. 2025 жылы елде 171 мыңнан астам көлік құрастырылған, оның 159 мыңы – жеңіл автомобильдер.