Қазақстанда алтын бағасы тарихи рекорд жаңартты

Қазақстанда алтынның ішкі нарықтағы бағасы тарихта алғаш рет 50 мың теңгеден асып, рекорд жаңартты, деп хабарлады Zakon.kz.

Ұлттық банктің ресми деректеріне сәйкес, 2025 жылғы 1 сәуірде алтынның 1 грамының бағасы 50 603,79 теңгеге жетсе, келесі күні — 2 сәуірде 50 657 теңгеге дейін өскен.

2025 жылдың басынан бері елімізде алтын 13 пайызға қымбаттаған. Мәселен, қаңтарда оның бағасы 44 811 теңге болған. Ал бір жыл бұрынғы көрсеткішпен салыстырсақ, өсім одан да жоғары: 2024 жылдың сәуірінде алтынның граммы 31 686 теңге болған, яғни баға 60 пайызға жуық өскен.

Алтын бағасының ресми курспен қатар күрт өсуі айырбастау пункттеріндегі құнға да әсер етіп жатыр. Қазіргі таңда алтынды сатып алу 48–50 мың теңге, ал сату 50–53 мың теңге шамасында.

Трамп Ақ үйге оралған күннен бастап алтын бағасы күрт өсе бастады. Сарапшылар мұны Дональд Трамптың әлемдік саясат пен экономикадағы тұрақсыздыққа әсер етуімен түсіндіреді. Соның салдарынан инвесторлар консервативті активтерге көшіп жатыр. 

20 қаңтарда бір унция алтынның бағасы шамамен 2700 доллар болса, наурыздың соңына қарай ол 3000 доллардан асып, тарихи рекорд орнатты.

2 сәуір күні Трамптың мәлімдемесінен кейін алтын бағасы тағы 1%-ға қымбаттап, унциясы 3146 долларға жетті. Кейін баға сәл төмендеп, 3142 доллар шамасында тұрақтады.